(ဈ)-ဦးထွန်းလွင်(ချောင်းဦးမဲဆန္ဒနယ်)

ချောင်းဦး-အမြင့်လမ်းတွင် ပျက်စီးနေသော ကတ္တရာလမ်းအား ၂၀၂၇-၂၀၂၈ ဘဏ္ဍာရေးနှစ်တွင် ပြန်လည်ပြုပြင် အဆင့်မြှင့်တင်ပေးရန် အစီအစဉ်ရှိ မရှိသိရှိလိုခြင်းနှင့် စပ်လျဉ်းသည့်မေးခွန်း

စစ်ကိုင်းတိုင်းဒေသကြီး၊ မုံရွာခရိုင်၊ ချောင်းဦးမြို့နယ်အတွင်းရှိ ချောင်းဦး-အမြင့်လမ်းသည် ၈ မိုင်၊ ၁ ဖာလုံရှည်လျားပြီး ချောင်းဦးမြို့၏ အနောက်ဘက်ရှိ ကျေးရွာပေါင်း ၁၈ ရွာရှိ ဒေသခံ ပြည်သူများ နေ့စဉ်သွားလာအသုံးပြုနေသည့်လမ်းဖြစ်ပါကြောင်း၊ ယခင်က မြေသားလမ်းသာ ရှိခဲ့ သော်လည်း သမ္မတကြီးဦးသိန်းစိန် အစိုးရတာဝန်ယူခဲ့စဉ်က ကျေးလက်ဒေသ ဖွံ့ဖြိုးရေး ရန်ပုံငွေ ဖြင့် ဘဏ္ဍာရေးနှစ် ၃ နှစ် ခွဲပြီး ကတ္တရာလမ်းအဆင့် ဆောင်ရွက်ပေးခဲ့သည်ကို တွေ့ရှိရပါ ကြောင်း၊ ၂၀၂၂-၂၀၂၃ ဘဏ္ဍာရေးနှစ်က ခရီးမိုင်ရှည်လျားသဖြင့် ချောင်းဦး-အမြင့်လမ်းကို သမဝါယမနှင့် ကျေးလက်ဖွံ့ဖြိုးရေးဝန်ကြီးဌာနမှ ဆောက်လုပ်ရေးဝန်ကြီးဌာန၊ ပြည်သူ့ ဆောက်လုပ်ရေး လုပ်ငန်းသို့ လွှဲပြောင်းပေးခဲ့သည်ကို သိရှိရပါ ကြောင်း၊ အဆိုပါလမ်းပေါ်တွင် တံတားပေါင်း ၁၆ စင်းပါရှိပြီး ကွန်ကရစ်တံတား ၁၂ စင်းနှင့် သစ်သား တံတား ၄ စင်းပါရှိပြီး အတိုဆုံးတံတားမှာ ၈ ပေ၊ အရှည်ဆုံးတံတားမှာ ၁၁၀ ပေဖြစ်ပါကြောင်း၊ ချင်းတွင်းမြစ်ရေ ဝင်ရောက်သော ဒေသ ဖြစ်သောကြောင့် မြေတားတမံဖို့ကာ ဖောက်လုပ်ထားသည့် အတွက် လမ်းပခုံးများကျဉ်းကာ တချို့သောနေရာများတွင် မော်တော်ယာဉ် ၂ စီး ခက်ခက်ခဲခဲ ရှောင်နေရပါကြောင်း။ 

ယခုအခါတွင် ချောင်းဦး-အမြင့်လမ်းသည် ကာလကြာရှည်စွာအသုံးပြုခဲ့ခြင်း၊ နှစ်စဉ်ပြုပြင် ထိန်းသိမ်းမှုအားနည်းခဲ့ခြင်း၊ တချို့သောနေရာများတွင် ရေတိုက်စားခံရသဖြင့် လမ်းဧရိယာများ ကျဉ်းမြောင်းလာခြင်း၊ ချိုင့်များဖြစ်ပေါ်လာခြင်းတို့ကြောင့် ယာဉ်များသွားလာရန် ခက်ခဲလာခဲ့ပါ ကြောင်း၊  အရှည်ဆုံး ၁၁၀ ပေ ရှိသည့် ရှမ်းတိုးတံတားသည် လတ်တလောဖြစ်ပေါ်နေသော အခြေ အနေများကြောင့် ၁၃-၄-၂၀၂၆ ရက်မှစတင်ပြီး အသုံးပြု၍မရတော့ဘဲ အဆက်အသွယ် ပြတ်တောက် သွားခဲ့ရပါကြောင်း၊ ထို့ကြောင့် မူလအနေအထားအတိုင်း ပြည်သူများ အဆင်ပြေ ချောမွေ့စွာအသုံးပြုနိုင်ရန် အဆိုပါလမ်းအား ပြန်လည် ပြုပြင်အဆင့်မြှင့်တင်ပေးခြင်း၊ သစ်သား တံတား ၄ စင်းအား ကွန်ကရစ်တံတားအဖြစ်သို့ အဆင့်မြှင့် တည်ဆောက်ပေးခြင်း၊ ပျက်စီးသွား‌သော ရှမ်းတိုးတံတားအား ပြန်လည်တည်ဆောက်ပေးခြင်းတို့ကို ၂၀၂၇-၂၀၂၈ ဘဏ္ဍာရေးနှစ်တွင် ထည့်သွင်းဆောင်ရွက်ပေးရန် အစီအစဉ်ရှိ/ မရှိ ကို မေးမြန်းပါသည်။

ဆောက်လုပ်ရေးဝန်ကြီးဌာန၊ ဒုတိယဝန်ကြီး၊ ဦးမျိုးမြင့် က

          အဆိုပါလမ်းသည် မန္တလေး-စစ်ကိုင်း-မုံရွာ-ရေဦးလမ်းပေါ်ရှိ ချောင်းဦးမြို့ နှင့် တောကျောင်းကြီး- အမြင့်-ရွှေဒါးကျလမ်းပေါ်ရှိ အမြင့်မြို့ဟောင်း ကို ဆက်သွယ်ထားသော လမ်း အရှည်မှာ ၈ မိုင်၊ ၁ ဖာလုံရှိပြီး ပြည်ထောင်စုမှ စီမံခန့်ခွဲသည့် Class-A လမ်းဖြစ်ပါကြောင်း၊ လက်ရှိလမ်းအခြေအနေမှာ ကတ္တရာလမ်း ၈ မိုင်၊ ၁ ဖာလုံဖြစ်ပါကြောင်း၊ စစ်ကိုင်းတိုင်းဒေသကြီး အတွင်း လမ်းမိုင်ပေါင်း ၅,၁၅၁ မိုင်၊ ၆ ဖာလုံရှိပြီး လက်ရှိလမ်းအခြေအနေများမှ ကတ္တရာ ကွန်ကရစ်လမ်း ၁၄၆ မိုင်၊ ၁ ဖာလုံ၊ ကွန်ကရစ်လမ်း ၄၁၇ မိုင်၊ ၃ ဖာလုံ၊ ကတ္တရာလမ်း ၁,၇၁၂ မိုင်၊ ၂ ဖာလုံ၊ ကျောက်လမ်း ၈၆၀ မိုင်၊ ၃ ဖာလုံ၊ အမာခံလမ်း ၆၉၉ မိုင်နှင့် မြေသားလမ်း ၁,၃၁၆ မိုင်၊ ၅ ဖာလုံ ဖြစ်ပါကြောင်း။

အဆိုပါလမ်းများတွင် ပျက်စီးမှုများနေသော ကတ္တရာလမ်းအပိုင်းများပြင်ခြင်းနှင့် တံတား ပြုပြင်ခြင်းလုပ်ငန်းအား လတ်တလော ဆောင်ရွက်နိုင်ခြင်းမရှိသေးပါကြောင်းနှင့် ကာလတို ၅ နှစ် စီမံချက်ကာလအတွင်း ၂၀၂၈-၂၀၂၉ ဘဏ္ဍာရေးနှစ်မှစတင်၍ ပြည်ထောင်စုရန်ပုံငွေတွင် နှစ် အလိုက်လျာထားပြီး ရန်ပုံငွေရရှိမှုအပေါ် မူတည်ပြီး ဆောင်ရွက်ပေးသွားမည်ဖြစ်ပါကြောင်း စစ်ကိုင်းတိုင်း ဒေသကြီးအစိုးရအဖွဲ့မှ ပေးပို့သောအချက်အလက်များနှင့်ပေါင်းစပ်ပြီး ဖြေကြားခဲ့ ပါသည်။