(ဂ)- ဦးထွန်းလွင်(ချောင်းဦးမဲဆန္ဒနယ်)

ချောင်းဦးမြို့ပေါ်ရပ်ကွက် (၄)ခု ရေကြီးနစ်မြုပ်မှုမှ ကင်းလွတ်စေရေး ဆောင်ရွက်ပေးရန် အစီအစဉ် ရှိ မရှိ သိရှိလိုခြင်းနှင့်စပ်လျဉ်းသည့်မေးခွန်း

ချောင်းဦးမြို့သည် နှစ်စဉ်ပျမ်းမျှ မိုးရွာရက်ပေါင်း ၅၀ ခန့်ရှိပြီး အမြင့်ဆုံးမိုးရေချိန် ၃၇.၅၅ လက်မခန့်အထိ ရွာသွန်းသည့် ဒေသဖြစ်ပါကြောင်း၊ ချောင်းဦးမြို့၏ အရှေ့မြောက်ဘက်တွင် နွယ်ခွေတောင်ကြောရှိပြီး ရေလှောင်တမံ မတည်ဆောက်မီ ၁၉၉၄ ခုနှစ်၏ အရှေ့ပိုင်း ကာလများ ဆီက နွယ်ခွေတောင်ကြော၏ မြောက်ဘက်ခြမ်းတွင်  မိုးသည်းထန်စွာရွာသွန်းပါက တောင်ကျ ချောင်းရေများ မြို့သစ်ရပ်ကွက်မြောက်ခြမ်းမှ မြို့မရပ်ကွက်အနိမ့်ပိုင်း တမာမြိုင်ရပ်ကွက်၊ အောင်မင်္ဂလာလမ်းပေါ်သို့ ဖြတ်သန်းစီးဆင်းပြီး ဆုတောင်းပြည့်ဘုရား၏ အနောက်ဘက်မှ တစ်ဆင့် မူလချောင်း အတွင်းသို့ စီးဝင်သွားပါကြောင်း၊ နွယ်ခွေတမံတည်ဆောက်ပြီး ၁၉၉၂ -၁၉၉၃ မှ ယခုအချိန်ထိ မြို့၏မြောက်ဘက်ခြမ်း ရေကြီးနစ်မြုပ်ခြင်းဘေးမှ ကင်းဝေးခဲ့ရပါကြောင်း၊ နွယ်ခွေ တောင်ကြော၏ တောင်ဘက်ခြမ်းတွင် မိုးရွာသွန်းပါက တောင်ကျချောင်းရေများသည် မြို့သစ် ရပ်ကွက်အရှေ့ခြမ်း၊ မြို့မရပ်ကွက်အရှေ့ခြမ်း၊ တမာမြိုင်ရပ်ကွက်အရှေ့ခြမ်းနှင့် တောင်ခြမ်း၊ ချောင်းဦးတောင်ရပ်ကွက် အရှေ့ဘက်ခြမ်းများကို ဖြတ်သန်းစီးဆင်းသွားကာ မြို့၏ တောင်ဘက် အနိမ့်ပိုင်း လယ်ကွင်းများထဲ သို့ ဖြန့်ကြက်စီးဝင်သွားပါကြောင်း၊ မိုးတွင်းကာလများတွင် မြို့ပေါ်နှင့် နွယ်ခွေ တောင်ကြော တစ်ပြိုင်နက်မိုးရွာလျှင်သော်လည်းကောင်း၊ တောင်ကြောဘက်တွင် မိုးအ ဆက် မပြတ် ရွာသွန်း လျှင် သော်လည်းကောင်း တောင်ကျချောင်းရေများ ချောင်းလုံး ပြည့်အရှိန်ဖြင့် စီးလာပြီး ချောင်းနံဘေး အနိမ့်ပိုင်းနေရာများရှိသည့် နေအိမ်များအတွင်း  ၃ပေမှ ၄ ပေ အထိ စီးဝင် နစ်မြုပ်ကာ ကျွဲ၊နွား၊ တိရစ္ဆာန်များမျောပါသေဆုံးခြင်း၊ ပရိဘောဂများမျောပါပျက်စီးခြင်း၊ တစ်ခါ တစ်ရံညအချိန် ရေကြီးပါက သက်ကြီးရွယ်အိုများအသက်ဆုံးရှုံးရခြင်း၊ အကြောင်းကြီးငယ်ရှိ၍ နေ့အချိန် ချောင်းဖြတ် ကူးခြင်း တို့ကြောင့် အသက်ဆုံးရှုံးခဲ့ရခြင်းများကို နှစ်စဉ်ကြုံတွေ့ နေကြရ ကြောင်း။

ရေကြီးနစ်မြုပ်ရခြင်း၏အဓိက အကြောင်းအရင်းမှာ ရေစီးရေလာမကောင်းခြင်းကြောင့်ဖြစ် သည့် အတွက် မိုးတွင်းကာလရေကြီး နစ်မြုပ်ခြင်းဘေးမှ ကာကွယ်နိုင်ရန်အတွက် မြို့ပေါ် ရပ်ကွက် ဧရိယာအတွင်း ဖြတ်သန်းစီးဆင်းသွားသည့်  ချောင်း၏အရှည် ၂. ၇ မိုင်ခန့်ကို ရေစီး ရေလာကောင်းမွန်စေရန်နှင့် ဖြောင့်တန်းစွာစီးဆင်းစေရန်အတွက် လိုအပ်သည့် ချောင်းရိုး တစ်လျှောက် နေရာများမှ ထပ်မံတူးဖော်ပေးခြင်း၊ လူနေအိမ်များနှင့် နီးကပ်သည့် နေရာ များတွင် ကျောက်စီ မြေထိန်း နံရံများပြုလုပ်ပေးခြင်းနှင့် အမှန်တကယ်လိုအပ်သည့် အရှေ့ မြို့သစ်ရပ်ကွက်နှင့် ‌ရထောင်ရပ်ဆုံရာ၊ ကျောင်းရာရပ်နှင့် ရပ်သာရပ်ဆုံရာ နေရာနှစ်နေရာ တို့တွင် ယာဉ်ငယ်များ မြင်းလှည်း၊ နွားလှည်းတို့ဖြတ်သန်းသွားလာနိုင်စေရန်အတွက် (၅) တန် ခံနိုင်ဝန်ရှိသည့် ကွန်ကရစ်တံတားနှစ်စင်း ထည့်သွင်းတည်ဆောက်ပေးခြင်းတို့ ဆောင် ရွက်ပေးမှသာ ချောင်းတစ်ဖက်ကမ်းနေ ပြည်သူများအတွက် အဆင်ပြေချော မွေ့ စေမည် ဖြစ်ပါကြောင်း၊ ထို့ကြောင့် ရေကြီးနစ်မြုပ်ခြင်းဘေးမှ ကင်းဝေးစေရန်နှင့် ချောင်း၏ တစ်ဖက် ကမ်းတွင်နေထိုင်ကြသူများ၏ ရင်သွေးငယ်များ၏ ပညာရေး၊ ကျန်းမာရေး ပြည်သူများ၏ စီးပွားရေး၊ လူမှုရေးကိစ္စရပ်များကို အချိန်ကန့်သတ်ချက်မရှိ လုပ်ဆောင်နိုင်စေရန် အတွက် မိမိတင်ပြခဲ့သည့် အစီအစဉ်များကို ဆောင်ရွက်ပေးရန်အစီအစဉ်ရှိ မရှိနှင့် ဆောင်ရွက်ပေး မည်ဆိုပါကမည်သည့်ဘဏ္ဍာရေးနှစ်တွင်ဆောင်ရွက်ပေးမည်ကိုသိရှိလိုပါကြောင်း မေးမြန်းခဲ့ ပါသည်။

နေပြည်တော်ကောင်စီ ၊ ကောင်စီဝင်၊ ဦးခင်မောင်လတ် က

ချောင်းဦးမြို့ပေါ် ၆ ရပ်ကွက်မှ ရပ်ကွက် ၄ ခု၏ အနိမ့်ပိုင်း နေရာများတွင် မိုးရာသီကာလ ရေကြီးနစ်မြုပ်မှုဘေးမှ ကင်းလွတ်စေနိုင်ရေး ဆောင်ရွက်ပေးရန် အစီအစဉ်ရှိ မရှိ သိရှိလိုခြင်းနှင့် စပ်လျဉ်းသည့် မေးခွန်းနှင့်စပ်လျဉ်း၍ ချောင်းဦးမြို့သည် မိုးသည်းထန်စွာရွာသွန်းပါက မြို့၏ အမြင့်ပိုင်း ဖြစ်သည့် အရှေ့မြောက်ဘက် နွယ်ခွေတောင်ကြောမှ စီးဝင်လာသော တောင်ကျရေ များသည် မြို့၏ မြောက်ဘက်ခြမ်းမှတစ်ဆင့် စတင်စီးဝင်လာကာ မြို့သစ်ရပ်ကွက် တောင်ဘက် ခြမ်း (မြို့လည်) သိမ်တော် တံတားအောက်မှ ချောင်းတစ်လျှောက် စီးဆင်း၍ ချောင်းဦး တောင် ရပ်ကွက် ဇေယျသုခတံတားအထိ ချောင်းဦးမြို့၏တောင်ဘက် လယ်ကွင်းများသို့ တောင်ကျရေများ ဖြတ်သန်းစီးဆင်းလျက်ရှိပါကြောင်း၊ မိုးသည်းထန်စွာရွာသွန်းပါက အဆိုပါ တောင်ကျရေများ ကြောင့် မြို့လည်သို့ ဖြတ်သန်းစီးဆင်းသည့် ချောင်းမှာ ယခုအချိန်တွင် တိမ်ကောနေပြီး အချို့ နေရာများတွင် ချောင်း၏အကျယ်မှာ ၁၅ပေ၊ အနက် ၆ ပေခန့်နှင့် အချို့နေရာများတွင် အကျယ် ၁၂ ပေ၊ အနက် ၄ ပေခန့်ရှိသဖြင့် ချောင်းရေလျှံပြီး မြို့ရဲ့အနိမ့်ပိုင်း ရပ်ကွက်များသို့ ရေဝင် ရောက် လျက်ရှိပါကြောင်း၊

မြို့နယ်စည်ပင်သာယာရေးအဖွဲ့မှ ရေဝင်ရောက်လေ့ရှိသည့် မြို့၏ အနိမ့်ပိုင်းရပ်ကွက် များဖြစ်သည့် မြို့သစ်ရပ်ကွက် တောင်ဘက်ခြမ်း ဘူတာရပ်အတွင်း ပေ ၁၅၀ဝ မြေသား ရေမြောင်းတူးဖော်ခြင်း၊ မြို့မရပ်ကွက် သိမ်တော်တံတားအနီး(မြို့လည်)ချောင်းသို့ စီးဝင်သည့် ပေ ၁၀၀၀ ရေဆိုးရေထုတ်မြောင်း တူးဖော်ခြင်း၊ မြို့မရပ်ကွက် ရုံးပတ်လမ်း ပေ ၁ဝဝဝ ရေမြောင်း တူးဖော်ခြင်း စုစုပေါင်းအရှည် ၃၅၀၀ ပေ၊ အကျယ် ၁၂ ပေ၊ အနက် ၈ ပေဖြင့် ရေစီးရေလာ ကောင်းမွန်ရေး ရန်ပုံငွေရရှိမှုအပေါ်မူတည်၍ အကောင်အထည်ဖော် ဆောင်ရွက်ပေးသွားမည် ဖြစ်ပါကြောင်း၊

ချောင်းဦးမြို့ မြို့မရပ်ကွက်၊ တမာမြိုင်ရပ်ကွက်နှင့် ချောင်းဦးတောင်ရပ်ကွက်တို့ ချိတ်ဆက် ထားသည့် အရှေ့ မအုပ်ရပ် ရေကျော်နေရာတွင် (၅)တန်ခံ အလျား ၂၀ ပေ၊ အကျယ်  ၁၂ ပေ၊ အမြင့် ၈ ပေကွန်ကရစ်တံတား ၁ စင်းနှင့် တမာမြိုင်ရပ်ကွက်အတွင်း လက်ရှိ ကိုယ်ထူကိုယ်ထ တည်ဆောက် ထားသည့် အလျား ၁၃ ပေ၊ အကျယ် ၁၃ ပေ၊ အမြင့် ၈ ပေရှိ တံတား၏ ချဉ်းကပ်ခုံ ၂ ဘက် တွင် ချောင်းအတွင်း တည်ဆောက်ထားသဖြင့် အဆိုပါနေရာတွင် လိုအပ်ချက်နှင့် ကိုက်ညီ သော တံတားတစ်စင်း အစားထိုး တည်ဆောက်ပေးပါက မိုးရာသီကာလတွင် ချောင်းရေ စီးဆင်း ပါက သွားလာမှုလွယ်ကူချောမွေ့စေပြီး၊ ရေစီးရေလာစနစ် ပိုမိုကောင်းမွန်မည်ဖြစ်သဖြင့် အဆိုပါ လုပ်ငန်း ၂ ခုအား ရန်ပုံငွေရရှိမှုအပေါ် မူတည်၍ အကောင်အထည်ဖော် ဆောင်ရွက်သွားမည် ဖြစ်ပါကြောင်း ပြန်လည်ဖြေကြားခဲ့ပါသည်။