(ခ)-မြင်းမူမြို့ စည်ပင်သာယာရေးဈေး အဆင့်မြှင့်တင်ဆောက်လုပ်ရန် လိုအပ်နေသည့် ဆေးရုံအဟောင်း မြေဧရိယာ ၁.၂၈၃ ဧကအား လွှဲပြောင်းပေးရန် ခွင့်မပြုခဲ့ခြင်းကိစ္စအား ပြန်လည်သုံးသပ်၍ ကော်မတီသို့ လွှဲပြောင်းအသုံးချခွင့်ပေးရန် အစီအစဉ်ရှိ/မရှိနှင့်စပ်လျဉ်းသည့်မေးခွန်း

 

မြင်းမူမြို့နယ်သည် ကျေးရွာအုပ်စု ၄၈ အုပ်စု၊ ရပ်ကွက်လေးခုနှင့် ဖွဲ့စည်းထားပြီး လူမှုစီးပွားဘဝ အသင့်အတင့် ဖွံ့ဖြိုးမှုရှိသည် မြို့နယ်တစ်ခုဖြစ်ပါကြောင်း၊ မြင်းမူမြို့မဈေးသည် မုံရွာ-မန္တလေး ကားလမ်းမပေါ်တွင် တည်ရှိပြီး တစ်နယ်လုံးက အားထားရသော ဈေးတစ်ခုဖြစ်ပါကြောင်း၊ လက်ရှိ ဈေး၏အခြေအနေသည် ပျံကျဈေးသည်များအတွက် ပေ ၅၀ ပတ်လည်ခန့်ရှိသည့် မြေကွက်ရှိပါကြောင်း၊ ပျံကျဈေးသယ် ၇၀၀ ကျော်သည် ၎င်းဈေးပတ်လမ်းများပေါ်တွင်၊ ရပ်ကွက်ကို ဝင်သည့်လမ်းများပေါ်နှင့် မုံရွာ-မန္တလေးကားလမ်းမ ကြီးများပေါ် တက်ပြီးရောင်းနေကြရပါကြောင်း၊ အမိုးအကာမရှိ မိုးရွာစို၊ နေပူခြောက် ဖြစ်သလိုရောင်းချနေရသည့် အနေအထားရှိပါကြောင်း၊ ထို့ကြောင့် အဆိုပါဈေးကို တိုးချဲ့ဆောက်လုပ်ရန်အတွက် မြေနေရာ လိုအပ်လာပါကြောင်း၊ သို့ပါသောကြောင့် ၂၀၁၄ ခုနှစ်တွင် ကျန်းမာရေးဝန်ကြီးဌာနက မြင်းမူမြို့နယ်တွင် တိုင်းရင်းဆေးရုံ တစ်ခုတည်ဆောက်ရန် မြေနေရာလိုအပ်သည့်အခါ မြင်းမူမြို့နယ် စည်ပင်သာယာရေး ကော်မတီပိုင်သည့် မြေသုံးဧကကို ကျန်းမာရေးဝန်ကြီးဌာနအား လွှဲပေးခဲ့သည်ကို သိရှိရပါကြောင်း၊ လွှဲပေးပြီး မြင်းမူဆေးရုံဝင်းဟောင်း မြေနေရာကို မြို့နယ်စည်ပင်သာယာရေးကော်မတီကို လွှဲပြောင်း ရရှိနိုင်ရေးအတွက် စတင်ဆောင်ရွက်ခဲ့ပါကြောင်း၊ ၎င်းဆောင်ရွက်ချက်များအနေဖြင့် စစ်ကိုင်းတိုင်း ဒေသကြီးအစိုးရအဖွဲ့မှ ပြည်ထောင်စုအစိုးရအဖွဲ့ထံကို ညှိနှိုင်းစာပေးပို့ခဲ့ပါကြောင်း၊ ယခုလို ပေးပို့ပြီးသည့်နောက် ကျန်းမာရေးဝန်ကြီးဌာနက ၎င်းဆေးရုံဝင်းဟောင်းထဲတွင် မိခင်နှင့်ကလေး စောင့်ရှောက်ရေးဌာန၊ ယခုပြည်သူ့ကျန်းမာဦးစီးဌာန ဖွင့်လှစ်ထားခြင်းဖြစ်သည့်အတွက် မြေနှင့်အဆောက်အဦ အစားထိုးပေးနိုင်မည်ဆိုပါက ထိုဆေးရုံဝင်းဟောင်း လွှဲပြောင်းရေးကို အဆင်ပြေအောင် ဆောင်ရွက်မည်ဟု အကြောင်းပြန်ကြားခဲ့ပါကြောင်း၊ ယခုလိုအကြောင်း ပြန်ကြားသည့်အတွက် တိုင်းဒေသကြီးအစိုးရအဖွဲ့၏ လမ်းညွှန်ချက်နှင့်အညီ မြင်းမူမြို့နယ် စည်ပင်သာယာရေး ကော်မတီမှ အကုန်အကျခံပြီး ပေ ၅၀ ပေ ၃၀ ရှိသည့် RC နှစ်ထပ် အဆောက်အဦအသစ်ကို မိခင်နှင့်ကလေးစောင့်ရှောက်ရေးအသင်း မြေနေရာတွင် ဆောက်လုပ် ပေးခဲ့ပါကြောင်း၊ ဆောက်လုပ်ပြီးသည့်အခါ တိုင်းဒေသကြီးအစိုးရမှတစ်ဆင့် ကျန်းမာရေး ဝန်ကြီးဌာနကို အဆိုပါအဆောက်အဦအသစ်အား လွှဲပြောင်းရယူပြီး ဆေးရုံဝင်းဟောင်းမြေနေရာကို လွှဲပြောင်းရရှိနိုင်ရေး ညှိနှိုင်းစာပေးပို့ခဲ့ပါကြောင်း၊ ယခုလိုပေးခဲ့သည့်အခါတွင် ကျန်းမာရေးဝန်ကြီး ဌာနက စီမံခန့်ခွဲမှုကော်မတီ ဆုံးဖြတ်ချက်အရ ၎င်းမြေနေရာကို ဆက်လက်အသုံးပြုမည် ဖြစ်သဖြင့် လွှဲပြောင်းခြင်းကို ခွင့်မပြုနိုင်သည့်အကြောင်း ပြန်လည်အကြောင်းကြားခဲ့ပါသည်။ ပထမကအဆောက် အဦနှင့်မြေနေရာ ရမည်ဆိုလျှင် လွှဲပေးမည်ဟု ပြည်ထောင်စုအစိုးရဆီကို သဘောထားမှတ်ချက် ပေးခဲ့ပါကြောင်း၊ ထို့နောက် အဆောက်အဦပြီး၍ လွှဲသည့်အခါ အဆိုပါ မြေလွှဲရေးကိစ္စသည် မဖြစ်နိုင်ကြောင်းကို ပြောကြားလာပါသည်။ ထို့ကြောင့် ယခုကဲ့သို့ နှောင့်နှေးမှုများ၊ ကြန့်ကြာမှုများ၊ ရှေ့နောက် မညီမှုများ ဖြစ်ပေါ်ခဲ့သည့်အတွက် မိမိတို့ မြို့နယ်နှင့် သက်ဆိုင်ရာ ကျန်းမာရေး ဝန်ကြီးဌာနမှ တာဝန်ရှိသူများအပေါ် နစ်နာမှုများ၊ မလိုလားအပ်သည့် အထင်လွဲမှားမှုများ ဖြစ်စေခဲ့ရပါကြောင်း၊ ထို့ကြောင့် ကျန်းမာရေးဝန်ကြီးဌာနမှ ပြန်လည်စိစစ်သုံးသပ်ရေး ကော်မတီဖွဲ့ပြီး အဆိုပါ ကိစ္စများကို ပြန်လည်စိစစ်သည့်အခါ သဘောတူညီမှု တချို့ရခဲ့သည်ဟု သိရှိရသည့်အတွက် မိမိအနေဖြင့် မြင်းမူမြို့ စည်ပင်သာယာဈေး တိုးချဲ့ရေးအတွက် အဆင်ပြေမည့် အဖြေတစ်ခု ဖြစ်လိမ့်မည်ဟု မျှော်လင့်ရင်း မြင်းမူမြို့ စည်ပင်သာယာဈေး အဆင့်မြှင့်တင် ဆောက်လုပ်ရန် လိုအပ်နေသည့် ဆေးရုံဝင်းဟောင်း မြေဧရိယာ ၁.၂၈၃ ဧကအား လွှဲပြောင်းပေးရန် ခွင့်မပြုခဲ့ခြင်း ကိစ္စအား ပြန်လည်သုံးသပ်၍ ကော်မတီသို့ လွှဲပြောင်းအသုံးချခွင့်ပေးရန် အစီအစဉ်ရှိ/မရှိနှင့် ရှိပါက မည်သည့်အချိန်တွင် လွှဲပြောင်းပေးမည် မရှိပါက မည်သည့်အတွက်ကြောင့် ဖြစ်သည်ကို သိရှိလိုပါကြောင်း မေးမြန်းပါသည်။


 

ဖြေကြားသူ
ကျန်းမာရေးနှင့်အားကစားဝန်ကြီးဌာန၊ ဒုတိယဝန်ကြီး ဒေါက်တာမြလေးစိန်
ဖြေကြားသည့် ဝန်ကြီးဌာန
အဖြေ

 

မြင်းမူမြို့နယ် ဆေးရုံအဟောင်းမြေနေရာတွင် လက်ရှိမိခင်နှင့်ကလေး ကျန်းမာရေးဌာန ဖွင့်လှစ်လျက်ရှိပြီး ကိုယ်ဝန်ဆောင်မိခင်နှင့်ကလေး ကျန်းမာရေးစောင့်ရှောက်မှု လုပ်ငန်းများ ကာကွယ်ဆေးထိုးခြင်း လုပ်ငန်းများကို ဆောင်ရွက်ပေးလျက် ရှိသည့်အပြင် အဆိုပါ ဌာနမှ ဝန်ထမ်းများနှင့် မြို့နယ်ပြည်သူ့ကျန်းမာရေး ဦးစီးဌာနမှ ဝန်ထမ်းများလည်း နေထိုင်လျက်ရှိပါကြောင်း၊ မြင်းမူမြို့နယ်ဈေး၊ စည်ပင်သာယာဈေး အဆင့်မြှင့်တင် ဆောက်လုပ်ရန် လိုအပ်နေသည့်အတွက် ဆေးရုံဟောင်း မြေဧရိယာ ၁.၂၈ ဧကအား ပြန်လည်စွန့်လွှတ်ပေးမည် ဖြစ်ပါကြောင်း ၃၀-၈-၂၀၁၈ ရက်နေ့တွင် ကျင်းပခဲ့သော ကျန်းမာရေးနှင့် အားကစားဝန်ကြီးဌာန လုပ်ငန်းညှိနှိုင်းအစည်းအဝေး အမှတ်စဉ် (၁၁/၂၀၁၈) မှ ဆုံးဖြတ်ခဲ့ပါကြောင်း၊ ဌာနပိုင်မြေကို စွန့်လွှတ်ပေးရန်အတွက် အဆိုပါ ဆေးရုံဟောင်း မြေနေရာတွင် ဖွင့်လှစ်ထားသော မိခင်နှင့်ကလေးကျန်းမာရေး ဌာနကို ပြည်သူလူထု လက်လှမ်းမီသည့် နေရာသို့ ပြောင်းရွှေ့၍ ကျန်းမာရေးစောင့်ရှောက်မှုများ ဆက်လက်ပေးနိုင်ရန် လိုအပ်လျက်ရှိပါကြောင်း၊ သို့ဖြစ်ပါ၍ မိခင်နှင့်ကလေးကျန်းမာရေး စောင့်ရှောက်မှုများ စဉ်ဆက်မပြတ် လုပ်ကိုင်နိုင်ရန်အတွက် ပြည်သူလူထု လက်လှမ်းမီသည့် မြေနေရာရရှိရေး ဆက်လက်ညှိနှိုင်း ဆောင်ရွက်ရန် အချက်ပေါင်းခုနစ်ချက် ပါဝင်သော ညှိနှိုင်းစာကို သက်ဆိုင်ရာဌာနများနှင့် ပေါင်းစပ်ညှိနှိုင်း ဆောင်ရွက်ပေးပါရန် ကျန်းမာရေးနှင့်အားကစား ဝန်ကြီးဌာန၏ ၁၃-၉-၂၀၁၈ ရက်စွဲပါ စာအမှတ်၊ ၅ (မကမ) ၂၀၁၈-၁၅၂၃၆ ဖြင့် စစ်ကိုင်းတိုင်းဒေသကြီး အစိုးရအဖွဲ့သို့ ညှိနှိုင်းပေးပို့ ထားပြီးဖြစ်ပါကြောင်း၊

သို့ဖြစ်ပါ၍ မူလဆေးရုံဟောင်းမြေနေရာ၊ မြေဧရိယာ ၁.၂၈၃ ဧကအား ပြန်လည်စွန့်လွှတ်ပေး မည်ဖြစ်ပါကြောင်းနှင့် ပြည်သူ့ကျန်းမာရေး စောင့်ရှောက်မှု လုပ်ငန်းများကို ထိရောက်စွာဆောင်ရွက် ပေးနိုင်မည့် အဆောက်အဦ ဆောက်လုပ်နိုင်ရေးအတွက် မြေနေရာအစားထိုးရရှိရေး သက်ဆိုင်ရာဌာနများနှင့် ပေါင်းစပ်ညှိနှိုင်း ဆောင်ရွက်လျက်ရှိပါကြောင်း ရှင်းလင်းဖြေကြားပါသည်။