(ဃ)-အာဆီယံပြည်ထောင်စုလမ်းမကြီးနှင့် ရန်ကုန်-မန္တလေးလမ်းဟောင်းသို့ ဆက်သွယ်ဖောက်လုပ်ထားသည့် ရွှေပြည်တော်ဝင်လမ်းပေါ်တွင် အများပြည်သူသွားလာ၍ မရအောင် ပိတ်ဆို့ထားသည့် ရထားသံလမ်းကူးဂိတ်အတားအဆီးအား ပြန်လည်ဖွင့်လှစ်ပေးရန် အစီအစဉ်ရှိ/မရှိနှင့် စပ်လျဉ်းသည့် မေးခွန်း

 

လယ်ဝေးမြို့နယ်ရှိ အာဆီယံပြည်ထောင်စုလမ်းမကြီးနှင့် ရန်ကုန်-မန္တလေးလမ်းဟောင်းသို့ ဆက်သွယ် ဖောက်လုပ်ထားသည့် ရွှေပြည်တော်ဝင်လမ်းပေါ်တွင် အများပြည်သူသွားလာ၍မရအောင် ပိတ်ဆို့ထားသည့် ရထားသံလမ်းကူးဂိတ်အတားအဆီးအား ပြန်လည်ဖွင့်လှစ်ပေးရန် အစီအစဉ်ရှိ/မရှိနှင့် စပ်လျဉ်းသည့် မေးခွန်း

ကျေးလက်နေပြည်သူများ၏ လူမှုစီးပွားဘဝ တိုးတက်လာစေရန် ပညာရေး၊ ကျန်းမာရေးအပါအဝင် လမ်းပန်းဆက်သွယ်ရေးသည် အလွန်အရေးပါသည့် အခန်းကဏ္ဍတွင် ပါဝင်နေပါကြောင်း၊ လမ်းပန်းဆက်သွယ်ရေး အဆင်ပြေချောမွေ့စေရေးအတွက် နိုင်ငံအနှံ့ လမ်းများဖောက်လုပ် ပေးနေသည့် ယခုအချိန်တွင် လယ်ဝေးမြို့နယ်အတွင်းရှိ အာဆီယံပြည်ထောင်စုလမ်းမကြီးနှင့် ရန်ကုန်-မန္တလေး လမ်းဟောင်းကြားတွင် ကျေးရွာအုပ်စုများ ဖြစ်ကြသည့် ပြည်ဝင်၊ ဝက်ကပူ၊ ညိုပင်၊ သက်ကယ်ကျဉ်းစသည့် ကျေးရွာအုပ်စုချင်းဆက်လမ်း ရွှေပြည်တော်ဝင်ဝင် လမ်းမကြီးကို နိုင်ငံတော်မှ ငွေကြေးအမြောက်အမြား အကုန်အကျခံပြီး ဖောက်လုပ်ခဲ့ခြင်း ဖြစ်ပါကြောင်း၊ ၎င်းလမ်းဖောက်လုပ်ခဲ့ပြီး မကြာခင် မီးရထားဌာနက ရထားသံလမ်းကူးရှိသည့် နေရာကို သံပေါင်အတား အဆီးများနှင့် ပြည်သူများဖြတ်သန်း သွားလာ၍မရအောင် လမ်းပိတ်ဆို့ခဲ့ပါကြောင်း၊ ယခုလို လမ်းပိတ်ဆို့ထားခြင်းကြောင့် မီးဘေးအန္တရာယ်အတွက် မီးသတ်ကားများ၊ အရေးပေါ် လူနာတင်ယာဉ်များ သွားလာ၍မရခြင်း၊ ကျောင်းသား/သူများ သွားလာရေးခက်ခဲခြင်းစသည့် ဒုက္ခမျိုးစုံကို ဒေသခံပြည်သူများ နေ့စဉ်ကြုံတွေ့ ခံစားနေရသည့်အတွက်ကြောင့် နေပြည်တော် ကောင်စီဝင်အပါအဝင် မီးရထားဌာနက တာဝန်ရှိသူများနှင့်အတူ လမ်းပိတ်ဆို့ထားသည့် ရထားသံလမ်းကူး ရှိသောနေရာကို သုံး၊ လေးကြိမ်ခန့် ကိုယ်တိုင်သွားရောက် ကြည့်ရှုခဲ့ပါကြောင်း၊ ပြည်သူများ ဖြတ်သန်းသွားလာ၍မရအောင် သံပေါင်တန်းများ လမ်းပိတ်ဆို့ထားသည့် သံလမ်းဂိတ်အား ပြန်လည်ဖွင့်လှစ်ပေးနိုင်ရန် တာဝန်ရှိသူများနှင့် အကြိမ်ကြိမ်ညှိနှိုင်း ပြောဆိုသော်လည်း ပြေလည်မှုမရရှိခြင်းကြောင့် ယခုလို လွှတ်တော်မှတစ်ဆင့် မေးမြန်းရခြင်း ဖြစ်ပါကြောင်း၊

နေပြည်တော်ကောင်စီရုံးမှ အကြောင်းကြီးငယ်ရှိသည့်အတွက် ရွှေပြည်တော်ဝင်လမ်းမကြီးကို အသုံးပြုပြီး အာဆီယံလမ်းမကြီးပေါ်ကို သွားမည်ဆိုပါက မိနစ် ၃၀ အတွင်း ရောက်ရှိနိုင်ပါကြောင်း၊ ယခုအခါ မီးရထားဌာနက အများပြည်သူများ သုံးစွဲ၍မရအောင် လမ်းပိတ်ဆို့ထားခြင်းကြောင့် မိနစ် ၃၀ ဖြင့် အရောက်သွားနိုင်မည့် နေရာကို နှစ်နာရီနီးပါးကြာအောင် ကွေ့ဝိုက်သွားနေရခြင်းကို စဉ်းစားရန်လိုအပ်ပါကြောင်း၊ ကျေးရွာအုပ်စုချင်းဆက်လမ်းဖြစ်သည့် ရွှေပြည်တော်ဝင်လမ်းမကြီးသည် ဒေသခံပြည်သူများအတွက် သာမကဘဲ နေပြည်တော်ကောင်စီ၏ အုပ်ချုပ်ရေးနှင့်နယ်မြေ လုံခြုံရေးအတွက်ပါ အလွန်အရေးပါသော လမ်းတစ်လမ်းလည်း ဖြစ်ပါကြောင်း၊ သို့ဖြစ်ပါ၍ လယ်ဝေးမြို့နယ်အတွင်းရှိ အာဆီယံပြည်ထောင်စု လမ်းမကြီးနှင့် ရန်ကုန်-မန္တလေးလမ်းဟောင်းသို့ ဆက်သွယ်ဖောက်လုပ်ထားသည့် ရွှေပြည်တော်ဝင်လမ်းပေါ်တွင် အများပြည်သူများ ဖြတ်သန်းသွားလာ၍ မရအောင် လမ်းပိတ်ဆို့ထားသည့် ရထားသံလမ်း ဂိတ်အတားအဆီးအား ပြန်လည်ဖွင့်လှစ်ပေးရန် အစီအစဉ်ရှိ/မရှိ ပြည်သူများကိုယ်စား သိရှိလိုပါကြောင်း မေးမြန်းပါသည်။


 

ဖြေကြားသူ
ပို့ဆောင်ရေးနှင့်ဆက်သွယ်ရေးဝန်ကြီးဌာန၊ ဒုတိယဝန်ကြီး ဦးကျော်မျိုး
အဖြေ

 

ရန်ကုန်-မန္တလေးရထားလမ်း မိုင်တိုင်အမှတ် (၂၁၉) တွင် တည်ရှိသည့် ပြည်ဝင်ဘူတာယာဒ်ဝင်းလမ်း ၄ လမ်းဖြင့် တည်ဆောက်ထားပြီး ဘူတာ၏ ရန်ကုန်ဘက်ခြမ်း မိုင်တိုင်အမှတ် (၂၁၈) ကြေးနန်းခန်း အမှတ် (၂၃) နှင့် (၂၄) ကြားတွင် ယာဒ်ဝင်း (၄) လမ်းကို ဖြတ်သန်းသည့် လမ်းကူးတစ်ခုနှင့် ဘူတာ၏ မန္တလေးဘက်ခြမ်း မိုင်တိုင် (၂၁၉)၊ ကြေးနန်းခန်းအမှတ် (၁၃) နှင့် (၁၄) ကြားတွင် အစုန်/အဆန် ရထားလမ်းမကြီး နှစ်ခုကို ဖြတ်သန်းသည့် ရွှေပြည်တော်ဝင်လမ်းကူး တစ်ခုတို့ရှိရာ အဆိုပါ လမ်းကူးနှစ်ခုတို့တွင် တစ်မိုင်အတွင်း နီးကပ်စွာတည်ရှိနေပါကြောင်း၊ ဘူတာ၏ ရန်ကုန်ဘက်ခြမ်းတွင် တည်ရှိသည့် လမ်းကူးသည် ရထားလမ်း၏ အနောက်ဘက်ရှိ ပြည်ဝင်ကျေးရွာ အုပ်စုရွာများနှင့် ရန်ကုန်-မန္တလေး ကားလမ်းဟောင်းကို ဆက်သွယ်ဖြတ်သန်းလျက်ရှိပြီး ကျေးရွာနေပြည်သူများ အသုံးပြုနေသည့် လမ်းဖြစ်ပါကြောင်း၊ မန္တလေးဘက်ခြမ်းတွင်ရှိသည့် ရွှေပြည်တော်ဝင် လမ်းကူးသည် ရန်ကုန်-မန္တလေးကားလမ်းဟောင်းနှင့် ဆက်သွယ်ထားပြီး ပြူတွင်း-လယ်ဝေးအကြား ရထားလမ်း၊ ပျဉ်းမနား-လယ်ဝေး ကားလမ်းကိုဖြတ်ပြီး နေပြည်တော်သို့ တိုက်ရိုက် သွားလာနိုင်သော မြို့ရှောင်လမ်းဖြစ်ပါကြောင်း၊ ၎င်း ရွှေပြည်တော်ဝင် လမ်းကူးတွင် ၁၇-၁-၂၀၁၄ ရက်နေ့က ရထားနှင့် သုံးဘီးဆိုင်ကယ်တိုက်မိသည့် မတော်တဆမှုဖြစ်ပွားခဲ့ပြီး သေဆုံးသူတစ်ဦးနှင့် ဒဏ်ရာရသူ တစ်ဦးရှိခဲ့မှုကြောင့် မြန်မာ့မီးရထားအနေဖြင့် မတော်တဆမှု ထပ်မံမဖြစ်ပွား စေရေးအတွက် သံလမ်းဖြင့် ကာရံ၍ ပိတ်ပင်ထားခဲ့ပါကြောင်း၊

ရန်ကုန်-မန္တလေးရထားလမ်း ခရီးမိုင် ၃၈၅.၅ မိုင်အတွင်း၌ တရားဝင်လမ်းကူး ၂၈၁ ခုနှင့် တရားမဝင် လမ်းကူး ၁၈၁ ခု စုစုပေါင်း ၄၆၂ ခုရှိနေပါကြောင်း၊ အဆိုပါ လမ်းကူးများတွင် ရထားနှင့် ကုန်းလမ်းသွား ယာဉ်များတိုက်မိသည့် မတော်တဆမှုများအနေဖြင့် ၂၀၁၃ ခုနှစ်မှ ၂၀၁၈ ခုနှစ်အထိ ငါးနှစ်တာ ကာလအတွင်း ၄၂ ကြိမ် ဖြစ်ပွားခဲ့ပြီး စုစုပေါင်းသေဆုံးသူ ၁၉ ဦးနှင့် ဒဏ်ရာရရှိသူ ၁၆ ဦး ရှိခဲ့ပါကြောင်း၊ ၂၀၁၇-၁၈ ခုနှစ် တစ်နှစ်တာ ကာလအတွင်း၌ မြန်မာတစ်နိုင်ငံလုံးရှိ ရထားလမ်းပိုင်း အသီးသီးတွင် မတော်တဆမှု စုစုပေါင်းအကြိမ် ၃၅၀  ဖြစ်ပွားခဲ့သည့်အနက် ရထားလမ်းကူးများမှာ တိုက်ခိုက်မှု ၈၈ ကြိမ် ဖြစ်ပွားခဲ့သည့်အတွက် ၂၅ ရာခိုင်နှုန်းအထိ ဖြစ်ပေါ်ခဲ့ပါကြောင်း၊

ရထားလမ်းကူးများတွင် မတော်တဆမှု တိုးတက်များပြားလာသည့်အတွက် ပို့ဆောင်ရေးနှင့် ဆက်သွယ်ရေး ဝန်ကြီးဌာနအနေဖြင့် နေပြည်တော်နှင့် တိုင်းဒေသကြီး/ပြည်နယ် အသီးသီးရှိ တရားမဝင် ဂိတ်ပေါင်း ၂၄၈၅ ဂိတ်ကို ပိတ်သိမ်းနိုင်ရေးအတွက် ၂-၁-၂၀၁၈ ရက်နေ့တွင် နိုင်ငံတော် သမ္မတရုံးသို့ တင်ပြခဲ့ရာ ဆက်လက်ဆောင်ရွက်ရန် လမ်းညွှန်ခဲ့သဖြင့် ပြည်ထောင်စုအစိုးရအဖွဲ့ရုံးသို့ တင်ပြ၍ ပြည်ထောင်စုအစိုးရ အဖွဲ့ရုံးမှ တရားမဝင်ဂိတ်များ ပိတ်သိမ်းနိုင်ရေးအတွက် နေပြည်တော် ကောင်စီနှင့် သက်ဆိုင်ရာတိုင်းဒေသကြီး/ပြည်နယ် အစိုးရအဖွဲ့များသို့ ၁၈-၁-၂၀၁၈ ရက်နေ့တွင် အကြောင်းကြား ပေးထားပြီးဖြစ်ပါကြောင်း၊ မြန်မာ့မီးရထား၏ သွားလာရေးအထွေထွေ နည်းဥပဒေများအရ တစ်မိုင်အတွင်း လမ်းကူးနှစ်ခု မရှိရဟူသော ပြဋ္ဌာန်းချက်အရလည်းကောင်း၊ ယခု ဂျပန်နိုင်ငံအစိုးရ၏ ချေးငွေအကူအညီဖြင့် ဆောင်ရွက်နေသည့် ရန်ကုန်-မန္တလေး ရထားလမ်း အဆင့်မြှင့်တင်ရေး စီမံကိန်းပြီးစီးပါက ရထားပြေးဆွဲမှု အမြန်နှုန်းမှာ တစ်နာရီလျှင် မိုင် ၆၀ ခန့်အထိ တိုးမြှင့်လာမည်ဖြစ်၍ အန္တရာယ်ပိုများလာနိုင်ခြင်းကြောင့်လည်းကောင်း၊ ရထားလမ်း ၄ လမ်းကို ဖြတ်သန်းလျက်ရှိသည့် ရန်ကုန်ဘက်ခြမ်း မိုင်တိုင်အမှတ် (၂၁၈)၊ ကြေးနန်းခန်းအမှတ် (၂၃) နှင့် (၂၄) ကြားရှိ တရားမဝင် လမ်းကူးအား ပိတ်သိမ်းနိုင်ရေးနှင့် ပြန်လည်ဖွင့်လှစ်ပေးရန် မေးမြန်းထားသည့် မန္တလေးဘက်ခြမ်း မိုင်တိုင်အမှတ် (၂၁၉)၊ ကြေးနန်းခန်းအမှတ် (၁၃) နှင့် (၁၄) ကြားရှိ ရွှေပြည်တော်ဝင် ကားလမ်းကူးနေရာအား ပြန်လည်ဖွင့်လှစ်ပေးနိုင်ရေးအတွက် မြန်မာ့မီးရထားရုံးချုပ်အဆင့်၊ တိုင်းအဆင့်များမှ တာဝန်ရှိသူများသို့ ကွင်းဆင်းကြည့်ရှုခြင်း၊ ဒေသခံပြည်သူများကို တွေ့ဆုံ၍ ရှင်းလင်းတင်ပြခြင်း၊ ဒေသခံပြည်သူများ၏ သဘောတူညီမှုများ ရယူခြင်းတို့ကို ဆောင်ရွက်ခဲ့ပြီး ဖြစ်ပါကြောင်း၊

ရွှေပြည်တော်ဝင်လမ်းမကြီးပေါ်သို့ သွားလာရာတွင် လွယ်ကူစွာ ဖြတ်သန်းသွား လာနိုင်ရေးအတွက် ရန်ကုန်-မန္တလေး ရထားလမ်း မိုင်တိုင်အမှတ် (၂၁၈)၊ ကြေးနန်းခန်းအမှတ် (၂၃) နှင့် (၂၄) ကြားရှိ ရွာအဝင်လမ်းမှ မိုင်တိုင်အမှတ် (၂၁၉)၊ ကြေးနန်းခန်းအမှတ် (၁၃) နှင့် (၁၄) ကြားရှိ ရွှေပြည်တော် ဝင်လမ်းအထိ ရထားလမ်း၏ အရှေ့ဘက်ခြမ်းမှ အရှည်ပေ ၈၀၀၊ အနောက်ဘက်ခြမ်းမှ အရှည် ၃၃၀၀ ပေရှိ အကျယ် ၁၂ ပေ မြေသားလမ်းများ ဖောက်လုပ်ခြင်း၊ အချင်း ၄ လက်မရှိ ပြွန်ပေါက်တံတား ၃ လုံး ဆောက်လုပ်ခြင်းတို့ကို မြန်မာ့မီးရထား အစီအစဉ်ဖြင့် ဆောင်ရွက်ပေးသွားမည် ဖြစ်ပါကြောင်း၊

ရန်ကုန်-မန္တလေး ရထားလမ်းပေါ်ရှိ မိုင်တိုင်အမှတ် (၂၁၉)၊ ကြေးနန်းခန်းအမှတ် (၁၃) နှင့် (၁၄) ကြားရှိ ကားလမ်းကူးအား ပြန်လည်ပြုပြင်ခြင်း၊ ရထားလမ်းဘေးနှစ်ဖက်တွင် ဒေသခံပြည်သူများ သွားလာနိုင်ရန် ရွာအဝင်လမ်းများ ဖောက်လုပ်ပေးခြင်း၊ ပြွန်ပေါက်တံတားများ ဆောက်လုပ်ခြင်း၊ ဂိတ်တံခါးနှင့် ဂိတ်တဲများပြုလုပ်ခြင်း၊ ဂိတ်စောင့်များ နေထိုင်နိုင်ရန် နှစ်ခန်းတွဲ နေအိမ်ပြုပြင်ခြင်း၊ သတိပေး ဆိုင်းဘုတ်များ တပ်ဆင်ခြင်း လုပ်ငန်းများအတွက် ခန့်မှန်းကုန်ကျစရိတ် ငွေကျပ် ၄၀.၂ သန်းခန့် ကုန်ကျမည်ဖြစ်ပြီး ၎င်းကုန်ကျငွေကို ၂၀၁၈-၁၉ ဘဏ္ဍာရေးနှစ် မြန်မာ့မီးရထား၊ မြို့ပြ အင်ဂျင်နီယာဌာန သာမန်အသုံးစရိတ်မှ ကျခံ၍ ၂၀၁၉ ခုနှစ် ဖေဖော်ဝါရီလကုန်ခန့်တွင် ပြီးစီးအောင် ဆောင်ရွက်ရန် စီစဉ်လျာထားပါကြောင်း ရှင်းလင်းဖြေကြားပါသည်။