(စ)-ဝင်းမာလာအောင်ကုမ္ပဏီမှ အများပြည်သူသွားလာသည်‌့လမ်းအား ပိတ်၍ခြံဝင်းခတ်ထားခြင်းကို ဂရန်ချပေးထားခြင်း ကိစ္စနှင်‌့စပ်လျဉ်း၍ ညွှန်ကြားချက်အတိုင်း ဆက်လက်ဆောင်ရွက်နိုင်ရန် မည်သို့စီစဉ်ထားသည်ကို သိလိုခြင်းနှင်‌့ စပ်လျဉ်းသည့်မေးခွန်း

 

(စ)-ဝင်းမာလာအောင်ကုမ္ပဏီမှ အများပြည်သူသွားလာသည်‌့လမ်းအား ပိတ်၍ခြံဝင်းခတ်ထားခြင်းကို ဂရန်ချပေးထားခြင်းကိစ္စနှင်‌့စပ်လျဉ်း၍ ၂၀၁၇ ခုနှစ် ဇန်နဝါရီလတွင် မကွေးတိုင်းဒေသကြီး ဝန်ကြီးချုပ်ထံ တိုင်ကြားခဲ့၍ ပြည်ထဲရေးဝန်ကြီးဌာနမှ ကွင်းဆင်းစစ်ဆေးပြီး ဂရန်ပြန်လည်ပယ်ဖျက် ပေးရန် ညွှန်ကြားကြောင်း သိရှိရသော်လည်း တစ်နှစ်ခွဲကျော် ကြာသည်‌့ ယခုထက်တိုင် လမ်းကို ဖွင်‌့မပေးသည်‌့ကိစ္စအား ညွှန်ကြားချက်အတိုင်း ဆက်လက်ဆောင်ရွက်နိုင်ရန် မည်သို့စီစဉ်ထားသည်ကို သိလိုခြင်းနှင်‌့ စပ်လျဉ်းသည့်မေးခွန်း

မကွေးတိုင်းဒေသကြီး၏ မြောက်ဘက်ထိပ်ဆုံးတွင် ဂန့်ဂေါမြို့နယ်က ချင်းပြည်နယ်စစ်ကိုင်းတိုင်း ဒေသကြီးအစပ်တွင် တည်ရှိပါကြောင်း၊ ၁၉၉၀ ခုနှစ်မတိုင်မီက မြို့အဝင်လမ်းမကြီးသည် တစ်လမ်းသွားဖြစ်သဖြင့် အလွန်ကျဉ်းမြောင်းပါသော်လည်း ၎င်းနေရာတွင် လှည်းလမ်းကြောင်း အတွက်ကိုပါ ပေးထားခဲ့ပါကြောင်း၊ နွေရာသီတွင် ကားကြီးများပါ သွားလာခဲ့ကြပါကြောင်း၊ ၁၉၉၀ ခုနှစ်တွင် ဝန်ထမ်းများကို အိမ်ရာကွက်သစ်များ ချပေးထားခဲ့ပါကြောင်း၊ ၎င်းကိစ္စမတိုင်ခင်က ယခုအချင်းဖြစ်နေရာတွင် သမဝါယမအသင်းမှ သီးနှံသွင်းလက်ခံကြောင်း သိရှိရပါကြောင်း၊ ရှေးယခင်က ရှေးလူကြီးများ ပြောစကားအရ သစ်ထုတ်ရေး၏ဆင်ဝိုင်းများ ခေတ္တစခန်းချရာ နေရာဖြစ်ပါကြောင်း၊ ထိုနေရာကို ဒေသအခေါ် အင်းဇောင်းဟု ခေါ်ကြပါကြောင်း၊ ၁၉၉၀ ခုနှစ်မတိုင်ခင် နှစ်များက ဆိုရှယ်လစ် ခေတ်ဖြစ်သဖြင့် သမဝါယမအသင်းက ပြည်သူအားလုံးပိုင်ဆိုင်ထားခြင်းကြောင့် ကန့်ကွက်သူမရှိ နေရာရခဲ့ခြင်း ဖြစ်ပါကြောင်း၊ သို့သော်လည်း ၁၉၉၅ ခုနှစ်၊ မြေစာရင်းဌာန၏ (၁-က) စာရင်းတွင် မြို့မြေဟု မရေးဘဲ L ဟု စာရင်းသွင်းထားပါကြောင်း၊ အနီးနားရွာများဖြစ်သည့် လဘို့ကျေးရွာ၊ ရွာစည်ကျေးရွာ၊ ဆိုင်တူးကျေးရွာ၊ ပိုဦးကျေးရွာနှင့် မြို့ပေါ်က ခ.လ.ရ (၅၀) တပ် ရေဘုတ်ရပ်ကွက်တု့ိမှ ကျောင်းသား/သူများ ဂန့်ဂေါအ.ထ.က သို့ ဖြတ်သန်းသွားလာ ကျောင်းတက်ခဲ့ရသည့် လမ်းလည်း ဖြစ်ပါကြောင်း၊ ၁၉၉၆ ခုနှစ်တွင် သစ်ထုတ်ရေးဌာန သမဝါယမထံမှ ပြန်စိပ်စက်တည်ထောင်ရန် ငှားရမ်းသုံးစွဲခဲ့ပါကြောင်း၊ ၂၀၀၃ ခုနှစ်တွင် ဝင်းမာလာအောင်ကုမ္ပဏီမှ ဝယ်ယူခဲ့ပြီး ၂၀၁၃ ခုနှစ်တွင် အုတ်တံတိုင်း ကာရံခဲ့သည့်အတွက် မြို့လူထုက ဝိုင်းဝန်းကန့်ကွက်ခဲ့ပါကြောင်း၊ ခုံရုံးဖွဲ့စစ်ဆေးခဲ့ကြောင်း သိရသော်လည်း ၎င်းခြံဝင်းအပြင်ဘက်မှ ကွေ့ရှောင်ပြီး လမ်းဘေးမြေဟုဆိုကာ တာဝန်ရှိသူများနှင့် ပူးပေါင်းပြီး ရွေးကောက်ပွဲမတိုင်မီ ၂-၉-၂၀၁၅ ရက်နေ့တွင် ဂရန်နှစ်ပိုင်းခွဲပြီး ရယူသွားခဲ့ပါကြောင်း၊ ပြည်သူ့အစိုးရလက်ထက်တွင် မိမိကိုယ်တိုင် တိုင်းဝန်ကြီးချုပ်ထံတင်ပြခဲ့ခြင်းကြောင့် အကြိမ်ကြိမ် တိုင်းဒေသကြီး/ခရိုင် အဆင့်ဆင့်စစ်ဆေးခဲ့ပြီး ဝန်ကြီးချုပ်မှအများ ပြည်သူပိုင်ဆိုင်သော လမ်းအား ပြန်လည်ဖွင်‌့လှစ်ပေးရန် ဂရန်ကိုပြန်လည်ပယ်ဖျက်ရန် လမ်းညွှန်ခဲ့ပါကြောင်း၊

မိမိယခုတင်ပြလိုသည်မှာ သက်ဆိုင်ရာဌာနအသီးသီးတွင် မပြောင်းလဲလိုသော အောက်ခြေမှတာဝန်ရှိသူ အချို့သည် အများပြည်သူနှင့်သက်ဆိုင်သည့် ကိစ္စရပ်များကို ကိုယ်ထင်သလို ချယ်လှယ်နေကြကြောင်းကို သက်သေအထောက်အထားဖြင့် တင်ပြသွားမည် ဖြစ်ပါကြောင်း၊ ဝန်ကြီးချုပ်က အမှုကို အဖွဲ့ဖွဲ့စစ်ဆေးစေသည့်အခါ ၎င်းကိုယ်တိုင်ခေါင်းဆောင်ပြီး မိမိနှင့်အတူ စည်ပင်အမှုဆောင် အရာရှိ ပါဝင်ခဲ့ပါကြောင်း၊ မိမိတို့ဘက်က ၁၉၉၀ ခုနှစ် မြို့မြေကွက်ချသည့် မြေပုံကိုတောင်းသည့်အခါ ကလေး ကစားသကဲသို့ မြေကွက်ပုံစံလေးများ ဖြတ်ယူလာပြီး ၁၉၈၇ ခုနှစ်က မြေပုံပေါ်တွင် ကပ်ပြခဲ့ပါကြောင်း၊ မိမိတု့ိဆိုလိုသည်မှာ မြို့မြေကွက်သစ်ချထားစဉ်တွင် မြေပုံမှာ၎င်းလမ်းသည် ထင်ရှားစွာပါဝင်ကြောင်း ပြလိုခြင်းဖြစ်ပြီး ထိုသူတို့ဘက်က ၎င်းမြေပုံမရှိကြောင်း၊ ငြင်းဆိုခဲ့ပါကြောင်း၊ မြေပုံအပြည့်အစုံကို မပြဘဲ အစိတ်အပိုင်းလေးများသာ ပြသပြီး မေကွက်သစ်ချထားပေးခဲ့သည်ဟု ယုတ္တိမတန်စွာနှင်‌့ ငြင်းဆိုခဲ့ပါကြောင်း၊ ၎င်းကိစ္စရပ်ကို စစ်ဆေးသူခေါင်းဆောင် ဌာနတာဝန်ရှိသူက ယခုကဲ့သို့ ဖြစ်နေသည့်အတွက် မိမိတို့က ထပ်မံတိုင်ကြားခဲ့ရပါကြောင်း၊ ၂၀၁၇ ခုနှစ် သြဂုတ်လတွင် တိုင်းဒေသကြီးမှ အဖွဲ့ဖွဲ့စစ်ဆေးစေခဲ့ပြန်ပါကြောင်း၊ ထိုအခါ ခိုင်လုံသည့်အကြောင်းပြချက် မရှိဘဲ မြေတစ်ကွက်ထဲကို ဦးပိုင် ၂ ခု၊ ဂရန်နှစ်ပိုင်းပိုင်းပြီး ချပေးထားသည့်အတွက် ယုတ္တိမတန်မှု၊ မူလလမ်းဟောင်းကို ပိတ်ပြီးခြံဘေးမှ ကွင်းလမ်းပေးထားသည့် အတွက်လည်း ဥပ‌ဒေ‌များနှင့် မညီညွတ်မှုများ ပေါ်ပေါက်ခဲ့ပြီး လမ်းဖွင်‌့ပေးရန် ဆုံးဖြတ်ခဲ့ကြပါကြောင်းကို ကြားသိရပါကြောင်း၊

ယခုအချိန်တွင် ဌာနဆိုင်ရာ အဖွဲ့အစည်းအသီးသီးကပင်လျှင် သိမ်းဆည်းမြေများကို ပြန်လည်စွန့်လွှတ် ပေးနေသည့် အချိန်ဖြစ်ပါကြောင်း၊ ပုဂ္ဂလိကတစ်ဦးက အများပြည်သူပိုင်သည့် လမ်းကို အုတ်တံတိုင်း ခတ်ပြီး ပိတ်ရဲခြင်းမှာ အင်မတန်အတင်‌့ရဲသည့် ကိစ္စဖြစ်ပါကြောင်း၊ တိုင်းမှလာရောက် စစ်ဆေးသော အဖွဲ့က ဂရန်ချထားပေးသည့် တာဝန်ရှိသူများကိုပါ လိုအပ်သလို အရေးယူရန် စိစစ်တင်ပြခဲ့ကြောင်းလည်း သိရှိရပါသည်။ ထိုကိစ္စကို စစ်ဆေးခဲ့သည်မှာ အကြိမ်ပေါင်းလည်း မနည်းပါကြောင်း၊ အမှန်တရားဘက်မှ ရပ်တည်ထွက်ဆိုခဲ့သည့် ရယကနှစ်ဆက်တိုင်လုပ်ခဲ့သော ဗိုလ်ကြီးအငြိမ်းစားနှင်‌့ ဂရန်ချထားပေးသည့် ကောလိတ္တော် အရာရှိပင်လျှင် ကွယ်လွန်ခဲ့ပြီ ဖြစ်ပါကြောင်း၊ ၎င်းမြေနေရာ တည်ရှိသည့် အမှတ် (၁) ရပ်ကွက်အုပ်ချုပ်ရေးမှူး အဆက်ဆက်၊ အမှတ် (၄) ရပ်ကွက်တွင် သုံးဆက်တိုင်အုပ်ချုပ်ခဲ့သည့် အုပ်ချုပ်ရေးမှူး၊ လဘို့ကျေးရွာနှင်‌့ ဆိုင်တူးကျေးရွာမှ အုပ်ချုပ်ရေးမှူးများအားလုံးသည် ၎င်းတို့ဖြတ်သန်း၍ ကျောင်းသွားခဲ့သည့် နေရာဆိုသည်ကို ပြည်သူဘက်မှ ရပ်တည်ထွက်ဆိုပြီး ဖြစ်ပါကြောင်း၊ ထို့ကြောင့် မိမိသိရှိလိုသည်မှာ ယခုလက်ရှိ ကောလိတ္တော်အရာရှိအဖြစ် တာဝန်ထမ်းဆောင်နေသူက မည်သည့်အတွက်ကြောင့် ကြန့်ကြာနေပါသနည်း၊ မိမိမေးသည့်အခါတိုင်း ဂရန်ပြန်မအပ်သေးပါဆိုသည့် အဖြေသည် သင်‌့လျော်ပါသလား၊ ဖြစ်သင်‌့ပါသလား၊ ဥပဒေနှင့်ညီပါသလား၊ အချိန်မည်မျှကြာကြာ ဂရန်မအပ်လို့ဆိုပြီး စောင့်နေခွင်‌့ရှိပါသလား ဆိုသည်ကို သိရှိလိုပါကြောင်း မေးမြန်းပါသည်။


ဖြေကြားသူ
ပြည်ထဲရေးဝန်ကြီးဌာန၊ ဒုတိယဝန်ကြီး ဗိုလ်ချုပ်အောင်သူ
ဖြေကြားသည့် ဝန်ကြီးဌာန
အဖြေ

 

မကွေးတိုင်းဒေသကြီး၊ ဂန့်ဂေါခရိုင်၊ ဂန့်ဂေါမြို့၊ မြောက်ကုန်းရပ်ကွက်၊ အကွက်အမှတ် (၃)၊ အကွက်အမည် (မြောက်ကုန်း)၊ မြို့မြေ၊ ဦးပိုင်အမှတ် (၇၈/၆)၊ မြေဧရိယာ ၁.၇၁၅ ဧကရှိမြေကို မြို့နယ် သမဝါယမအသင်းထံမှ ၁၅-၃-၂၀၁၆ ရက်နေ့တွင် ဦးဝင်းကို (ဝင်းမာလာအောင်ကုမ္ပဏီ) သည် မှတ်ပုံတင် စာချုပ်ချုပ်၍ ဝယ်ယူခဲ့ခြင်း ဖြစ်ပါကြောင်း၊ ဦးဝင်းကိုမှ ဝယ်ယူခဲ့သည့် မြေဧရိယာကို ဦးပိုင်အမှတ် (၇၈/၆-က)၊ မြေဧရိယာ ဝ.၈၃၄ ဧကနှင်‌့ ဦးပိုင်အမှတ် (၇၈/၆-ခ)၊ မြေဧရိယာ ဝ.၈၂၄ ဧကအဖြစ် မြေကွက်နှစ်ကွက်ခွဲ၍ အချက်အလက်အထောက်အထားများနှင်‌့အတူ မြေငှားဂရန် ချထားပေးပါရန် လျှောက်ထားခဲ့ပါကြောင်း၊ လျှောက်ထားမှုအပေါ် ကန့်ကွက်သူများရှိပါက ကန့်ကွက်လွှာတင်သွင်း နိုင်ကြောင်း ကြော်ငြာခဲ့ရာ ကန့်ကွက်မှုများ မရှိခဲ့ပါကြောင်း၊ မြို့နယ်လယ်ယာမြေ စီမံခန့်ခွဲရေးနှင်‌့ စာရင်းအင်းဦးစီးဌာနသို့ မြေရာဇဝင်တောင်းခံခြင်း၊ လျှောက်ထားသူအပါအဝင် ပတ်ဝန်းကျင်ရှိ နေထိုင်သူများအား ခေါ်ယူစစ်ဆေးခြင်း၊ မြေငှားဂရန်လျှောက်ထားသည့် မြေနေရာသို့ ကွင်းဆင်း စစ်ဆေးခြင်း၊ သက်ဆိုင်ရာဌာန၊ အဖွဲ့အစည်းများ၏ သဘောထားမှတ်ချက် ရယူခြင်းတို့ကို ဆောင်ရွက်ခဲ့ပါကြောင်း၊ ထိုသို့ လုပ်ထုံးလုပ်နည်းများနှင်‌့အညီ စိစစ်ပြီး ဦးပိုင်အမှတ် (၇၈/၆-က)၊ မြေဧရိယာ ဝ.၈၃၄ ဧကနှင်‌့ ဦးပိုင်အမှတ် (၇၈/၆-ခ)၊ မြေဧရိယာ ဝ.၈၂၄ ဧကတု့ိအား ၂၂-၉-၂၀၁၅ ရက်နေ့တွင် ဦးဝင်းကိုအမည်ပေါက် နှစ် ၃၀ မြေဂရန်ထုတ်ပေးခဲ့ခြင်း ဖြစ်ပါကြောင်း၊

အဆိုပါ မြေငှားဂရန်ရရှိသည့်မြေအတွင်း လမ်းဖောက်လုပ်နိုင်ရန်အတွက် ဂန့်ဂေါမြို့နယ် ပြည်သူ့လွှတ်တော် ကိုယ်စားလှယ် ဒေါ်ယဉ်မင်းလှိုင်မှ တိုင်ကြားသဖြင်‌့ ဂန့်ဂေါခရိုင် လယ်ယာမြေ စီမံခန့်ခွဲရေးနှင်‌့ စာရင်းအင်းဦးစီးဌာန၊ ခရိုင်ဦးစီးမှူးအဖွဲ့ခေါင်းဆောင်ဖြင်‌့ တိုင်ကြားသူ ဒေါ်ယဉ်မင်းလှိုင်နှင်‌့ မြို့နယ်စည်ပင် အမှုဆောင်အရာရှိတု့ိ အဖွဲ့ဝင်ပါဝင်သည့်အဖွဲ့ဖြင့် စိစစ်ခဲ့ပါကြောင်း၊ စစ်ဆေးချက်အရ လယ်ယာမြေ စီမံခန့်ခွဲရေးနှင်‌့ စာရင်းအင်းဦးစီးဌာနရှိ စာရင်း၊ မြေပုံများတွင် လမ်းမြေအဖြစ် မှတ်သားထားမှု မရှိကြောင်း၊ သက်ဆိုင်ရာအဖွဲ့အစည်းများမှလည်း လမ်းမြေအဖြစ် ခွင့်ပြုမိန့်ချထားခြင်း မရှိကြောင်း၊ ဂရန်လျှောက်ထားစဉ် ကန့်ကွက်သူမရှိကြောင်း၊ မြို့နယ်သမဝါယမ အသင်းပိုင်ဆိုင်ချိန်တွင် ခြံစည်းရိုးကာရံထားမှု မရှိသည်‌့အတွက် လူသွားလမ်းအဖြစ် အများပြည်သူအသုံးပြုခဲ့ကြောင်း၊ ဝင်းမာလာအောင် ကုမ္ပဏီပိုင်ဆိုင်ချိန်တွင် ခြံစည်းရိုးကာရံခဲ့ပြီး ၎င်းခြံပတ်ဝန်းကျင်ရှိ လယ်ယာမြေများအား ဝယ်ယူ၍ လမ်းဖောက်လုပ်ပေးထားကြောင်း စိစစ်တွေ့ရှိချက်များအရ သိရှိရပါကြောင်း၊ ထို့နောက် မကွေးတိုင်းဒေသကြီး အစိုးရအဖွဲ့၏ ညွှန်ကြားချက်အရ ဂန့်ဂေါခရိုင် အထွေထွေအုပ်ချုပ်ရေး ဦးစီးဌာနမှ ဒုခရိုင်အုပ်ချုပ်ရေးမှူး ဦးဆောင်သောအဖွဲ့ကို ထပ်မံစစ်ဆေးခဲ့ပါကြောင်း၊ အဆိုပါအဖွဲ့၏ စိစစ်ချက်အရ မြို့နယ်သမဝါယမ အသင်းပိုင်ဆိုင်ချိန်တွင် ပျက်စီးနေသည့် သစ်သားခြံစည်းရိုးများသာ ရှိခဲ့ပြီး ဖြတ်သန်းသွားလာ အသုံးပြုခဲ့ကြောင်း တိုင်းဒေသကြီးအစိုးရအဖွဲ့မှ မြို့ပတ်လမ်းနှင်‌့အတည်‌့ ကုမ္ပဏီဝန်းအတွင်း လမ်းဖောက်လုပ်ရန် ညွှန်ကြားထားခဲ့ရာ မည်သည်‌့ဌာနအဖွဲ့အစည်း၊ မည်သူကမှ တာဝန်ယူ ဖောက်လုပ်မည်ဆိုသည်ကို အခက်အခဲရှိနိုင်ခြင်း။ လက်ရှိတွင် ကုမ္ပဏီမှ မြေငှားဂရန် ရရှိထားပြီး အုတ်ခြံစည်းရိုးခတ်ထားပြီး ဖြစ်သဖြင်‌့ ၎င်း၏သဘော တူညီချက်မရရှိဘဲ အုတ်ခြံစည်းရိုး ဖြတ်၍ လမ်းဖောက်လုပ်ပါက ဆောင်ရွက်သူအားပြန်လည် တရားစွဲဆိုလာနိုင်ကြောင်း စသည်တို့ကြောင့် တိုင်းဒေသကြီးအဆင်‌့ ပုဂ္ဂိုလ်များဖြင်‌့ထပ်မံ စိစစ်သင်‌့ကြောင်း အကြံပြုပြန်လည်တင်ပြခဲ့ပါသည်။ အဆိုပါအကြံပြုချက်အရ မကွေးတိုင်းဒေသကြီးအစိုးရအဖွဲ့ ညွှန်ကြားချက်ဖြင်‌့ မကွေးတိုင်း ဒေသကြီး အစိုးရအဖွဲ့ရုံး၊ ညွှန်ကြားရေးမှူးခေါင်းဆောင်သည့် အဖွဲ့ဖြင်‌့ ထပ်မံစိစစ်ခဲ့ပါကြောင်း၊ အဆိုပါ စုံစမ်းစစ်ဆေးရေးအဖွဲ့ စုံစမ်းစစ်ဆေးတွေ့ရှိချက်များအရ ဝင်းမာလာအောင်ကုမ္ပဏီပိုင်ခြံဝင်းတွင် ယခင်သမဝါယမအသင်း ပိုင်ဆိုင်ခဲ့သည်‌့ အချိန်ကာလတစ်လျှောက်လုံး တရားဝင်လမ်းရှိ/မရှိ အထောက်အထား ခိုင်လုံစွာတင်ပြနိုင်ခြင်း မရှိသော်လည်း ဖြတ်သန်းသွားလာ အသုံးပြုခဲ့ကြောင်း သုံးသပ်တွေ့ရှိရသဖြင်‌့ မြေငှားဂရန်ပယ်ဖျက်နိုင်ရေး လုပ်ထုံးလုပ်နည်းများနှင်‌့အညီ တင်ပြဆောင်ရွက်ပြီး မြေငှားဂရန်ပယ်ဖျက်ပြီးပါက အများပြည်သူတင်ပြသည်‌့လမ်းကို ဖောက်လုပ်ပေးရန် စိစစ်အကြံပြု တင်ပြခဲ့ပါကြောင်း၊ ထိုတင်ပြချက်အပေါ် မကွေးတိုင်းဒေသကြီးအစိုးရအဖွဲ့ အစည်းအဝေး အမှတ်စဉ် (၃၅/၂၀၁၇)၊ ဆုံးဖြတ်ချက်အပိုဒ် ၆ အရ ဂန့်ဂေါမြို့၊ မြောက်ကုန်းရပ်ကွက်ရှိ မြေငှားဂရန်ရယူပြီးဖြစ်သော ဦးပိုင်အမှတ် (၇၈/၆-က) နှင်‌့ (၇၈/၆-ခ) မြေကွက်အတွင်း လမ်းဖောက်လုပ်ခြင်းကို ဥပဒေနှင်‌့အညီ ဆောက်လုပ်နိုင်ရန် မြေငှားဂရန်ပယ်ဖျက်နိုင်ရေး ဌာနဆိုင်ရာလုပ်ထုံးလုပ်နည်းနှင်‌့ အညီဆောင်ရွက်ရန် ဆုံးဖြတ်ထားရှိပြီး ဂရန်ပယ်ဖျက်နိုင်ရေးအတွက်  ဥပဒေ၊လုပ်ထုံးလုပ်နည်းများနှင်‌့အညီ ဆောင်ရွက်သွားရန် မကွေးတိုင်းဒေသကြီး အထွေထွေအုပ်ချုပ်ရေးဦးစီးဌာနသို့ ၂၅-၉-၂၀၁၇ ရက်စွဲပါစာဖြင်‌့ ညွှန်ကြားထားရှိပြီး ဖြစ်ကြောင်း မကွေးတိုင်းဒေကြီးအစိုးရအဖွဲ့၏ ပေါင်းစပ်ဖြေကြား ချက်အရ သိရှိရပါကြောင်း၊

အဆိုပါမြေငှားဂရန် ပယ်ဖျက်နိုင်ရေးအတွက် ဂရန်ပယ်ဖျက်မည့် အမှုတွဲနှစ်တွဲအား မကွေးတိုင်းဒေသကြီး အထွေထွေအုပ်ချုပ်ရေး ဦးစီးဌာန၏ ၂-၄-၂၀၁၈ ရက်စွဲပါစာဖြင့် အထွေထွေ အုပ်ချုပ်ရေးဦးစီးဌာန ရုံးချုပ်သို့ တင်ပြခဲ့မှုအပေါ် စိစစ်ဆောင်ရွက်ခဲ့ရာ အမှုတွဲတွင် မည်သည်‌့အချက်ကြောင့် မည်သည်‌့ဥပဒေ၊ လုပ်ထုံးလုပ်နည်းနှင်‌့အညီ ဂရန်ပယ်ဖျက်လိုသည်‌့ အကြောင်းအရာ ပြည့်ပြည့်စုံစုံတိကျစွာ တင်ပြနိုင်ခြင်း မရှိသည့်အတွက် ပြန်လည်စိစစ်တင်ပြရန် မကွေးတိုင်းဒေသကြီး အထွေထွေအုပ်ချုပ်ရေး ဦးစီးဌာနသို့ ၂၇-၆-၂၀၁၈ ရက်နေ့တွင် အကြောင်းကြားထားရှိပြီး ဖြစ်ပါကြောင်း၊ သို့ပါ၍ (ဝင်းမာလာအောင်ကုမ္ပဏီ) အမည်ပေါက် မြေငှားဂရန်ကိစ္စနှင်‌့ စပ်လျဉ်း၍ မကွေးတိုင်းဒေသကြီး အထွေထွေအုပ်ချုပ်ရေး ဦးစီးဌာနမှ အမှုတွဲတွင် လိုအပ်လျက်ရှိသည့်  အထောက်အထားအချက်အလက်များ ပြည့်စုံစွာပြန်လည် တင်ပြလာပါက ဥပဒေ၊ နည်းဥပဒေ၊ လုပ်ထုံးလုပ်နည်းများနှင်‌့အညီ စိစစ်ဆောင်ရွက်သွားမည် ဖြစ်ပါကြောင်း ရှင်းလင်းဖြေကြားပါသည်။

ဒေါ်ယဉ်မင်းလှိုင် (ဂန့်ဂေါမဲဆန္ဒနယ်) က ဆက်စပ်မေးခွန်း မေးမြန်းပါသည်။

ယခုကျွန်မိမိတင်ပြသွားသည့်အတိုင်း ဝန်ကြီးချုပ်မှလည်း နှစ်ကြိမ်တိုင်တိုင် ညွှန်ကြားပြီး ဖြစ်ပါကြောင်း၊ တိုင်းဒေသကြီးအဆင်‌့မှလည်း ညွှန်ကြားချက်အရ လာရောက်စိစစ်ပြီး ဖြစ်ပါကြောင်း၊ စိစစ်ချက်ကိုလည်း တင်ပြထားသဖြင့် မိမိ၏လက်ထဲတွင် ရောက်ရှိနေပြီ ဖြစ်ပါကြောင်း၊ ၎င်းကိစ္စကို နောက်တစ်ခေါက် ပြန်လည်စစ်အုံးမည်ဆိုသည့်အတွက် မိမိတို့အနေဖြင့် မည်သည့်အချိန်တွင် နောက်ဆုံးသိရှိရမည်ကို သိရှိလိုပါကြောင်း ဆက်စပ်မေးခွန်း မေးမြန်းပါသည်။

ပြည်ထဲရေးဝန်ကြီးဌာန၊ ဒုတိယဝန်ကြီး ဗိုလ်ချုပ်အောင်သူ

မိမိတို့ပေးသည့်အခါ ကန့်ကွက်လွှာတောင်းရပါကြောင်း၊ ပြီးလျှင် မြို့နယ်လယ်ယာမြေနှင်‌့ စာရင်းဦးစီးဌာန မြေဂရန်လည်း တောင်းပါကြောင်း၊ ‌လျှောက်မှုအပါအဝင် ပတ်ဝန်းကျင်တွင်ရှိသည့် နေထိုင်သူများကို ခေါ်ယူစစ်ဆေးပါကြောင်း၊ မြေငှားဂရန်လျှောက်ထားသည့် မြေနေရာကို ကွင်းဆင်းစစ်ဆေးပါကြောင်း၊ သက်ဆိုင်ရာဌာန အဖွဲ့အစည်းများ၏ သဘောထားမှတ်ချက်ရယူပြီး ဆောင်ရွက်ရခြင်း ဖြစ်ပါကြောင်း၊ ၎င်းကို ဆောင်ရွက်ပြီးသည့်အခါတွင် သက်ဆိုင်ရာလုပ်ထုံးလုပ်နည်းများနှင်‌့အညီ ဂရန်ကို ထုတ်ပေးရခြင်း ဖြစ်ပါကြောင်း၊ ဂရန်ကိုပြန်လည်ပယ်ဖျက်သည့်အခါ မည်သည်‌့အချက်၊ မည်သည်‌့ဥပဒေ၊ မည်သည်‌့လုပ်ထုံး လုပ်နည်းများအရ ပယ်ဖျက်သင်‌့သည်ဆိုသည့်ကိစ္စကို မိမိတု့ိက အထောက်အထား ရမှသာလျှင် ဆောင်ရွက်ပေးနိုင်မည်ဖြစ်ပါကြောင်း ရှင်းလင်းဖြေကြားပါသည်။